الرئيسية / قصة نجاح أون لاين / آية محمد – أنا موجود

آية محمد – أنا موجود

أهلا بكم في أول قصة من قصص التحدي و النجاح

في سلسلة قصص النجاح أنا موجود على مجلة ناس أون لاين

قصة اليوم بطلتها هي آية محمد هيا بنا نتعرف سويا على بدايتها

و التحديات التي واجهتها و ما حققته من نجاح من خلال الحوار التالي

قصص نجاح أنا موجود على مجلة ناس أون لاين

سلسلة أنا موجود على مجلة ناس أون لاين

س: كلمينا عنك و عرفينا عليكي أكتر ؟

اسمي آيه محمد من محافظه الاسكندريه حاصلة على بكالوريوس ترميم آثار

أم لطفلين بنت وولد

س: كلمينا عن مشروعك أكتر و الفكرة عبارة عن إيه و بدأت إزاي ؟

اسم المشروع Modern House دلع بنات العجمي

المجال ادوات منزليه منتجات T. V

الفكره ابتدت ٢٠١٤ شهر واحد للاسف كنت حامل ف ريم فضلت الفكره لحد ما ولدتها وبقي عندها ٥شهور نفذت الفكره ونزلت اول معرض ليا و كان في إحدى القاعات .

وكان الشغل عباره عن اكسسوارات ونظارات وطواقي اطفال بس انا بطبيعتي مش بميل للحجات دي اكتر وكان اسم الجروب دلع بنات العجمي.

فضلت ف الشغل ده حوالي سنه كامله بس مش حساه مش حباه بدأت ف حجات انا اصلا بحب اشتريها للبيت عندي.

وتطورت الفكره اني اجيب المنتج واجربه واعرضه عندي ع الجروب وغيرت اسم الجروب ل Modern hose – بس مغيرتش دلع بنات لانها ف السيرش بتظهر اسرع.

س: إحساسك إيه بعد خوض التجربة و رد فعل الأسرة و العائلة و الاصدقاء و مين اكثر شخص دعمك؟

إحساسي بعد التجربه ثقتي ف نفسي زياده ببقي دايما مطمنه إني وأنا وولادي ماشيبن و إحتجنا حاجه بجيبها ع طول من غير ما أحتاج أرجع لباباهم.

لإن طبعا في ستات كتير لو إبنها طلب بونبونايه وهي مبتشتغلش لازم تتصل وتقول أجيب ولا ماجبش بتكلم على فئه أنا شفتها كده .

أما بالنسبة لرد فعل الأسره أمي و أبويا و إخواتي كانوا مرحبين جدا وساعدوني كتير معنويا وماديا

جوزي كان مرحب بالفكره لإنه عارف إني دايما بحب إثبات الذات وعارف أن لازم أحقق كياني و أحس بفرق من لما ابتديت أشتغل و انا ماكنتش بشتغل نفسيا عامله ازاي و كان طرف دعم مهم جدا لأن بدون موافقته اني اصلا اشتغل مش حنزل.

الحمد لله دعمي الأساسي و الكبير جدا أمي و حماتي دول أكتر اتنين بيساعدوني خصوصا إن في بيت و حضانه ومدرسه ومذاكره .

الأصدقاء ابتجوا يشتروا خصوصا لما يعرفوا إني جربت المنتج وكانت دي سياستي أجيب و أجرب و أقولهم التجربه.

س: مشروعك اون لاين فقط و لا ليه مكان على أرض الواقع ؟

المشروع كان أون لاين فتره كبيرة دامت لمده من ٢٠١٤ لحد ٢٠٢١ شهر ٧

من يوم ٢٥ -٧ -٢٠٢١ وأنا افتتحت محل صغير على قدي مش صغير أوي ومش كبير أوي بس أقدر أقول إني حققت خطوه كبيره ف مشوار النجاح .

س: هل راضية عن النتائج اللي عملتيها لحد دلوقتي و لا ؟ و ايه طموحك؟

طموحي مكان ومكان كبيييير إن شاء الله و راضيه عن النتائج بنسبه ٨٥٪ .

س: بشكل عام إيه رأيك في عمل المرأة و شايفة أنها المفروض تشتغل و لا تركز في البيت أكثر و هل ممكن تكون مضطرة تشتغل في الوقت الحالي لظروف المعيشة و لكن الأفضل لها التركيز في البيت ؟

شغل المرأه حاليا حاجة ضرورية جدا لإنه لو كان بالنسبه لناس زيي كده تحقيق ذات وزيادة دخل في نفس الوقت فهو بالنسبة لناس تانيه كتير مصدر دخل مهم.

و المرأه عموما كائن جبار تقدر تشتغل و تبقي شايفه متطلبات بيتها كويس جدا.

س: رأيك عن العمل عن طريق الإنترنت هل يمكن الاعتماد عليه كمصدر دخل أساسي ام اضافي ؟

العمل عن طريق النت ممكن يكون مصدر أساسي و يمكن الاعتماد عليه لو ركزنا فيه شويه وطورناه وطورنا من أفكارنا ومشينا مع إمكانيات سوق العمل من النوع ده لكن كل الناس حاليا بتبصله إنه مصدر إضافي لا يعتمد عليه بس أنا شايفه نقدر نعتمد عليه.

و في نهاية الحوار نحب نشكر آية على مشاركتها تجربتها و قصة نجاحها من البداية و لحد دلوقتي علشان تساعدنا إننا نقدر نقدم قصة نجاح من الواقع القريب تقدري إنتي كمان تعرفي تفاصيلها و تشاركينا قصتك أو حتى تكون مصدر إلهام بالنسبة لك في قصتك اللي جايه .

و نتمنى نكون قدمنا ليكم محتوى مفيد من خلال سلسلة قصص النجاح – انا موجود على مجلة ناس أون لاين علشان تكون مصدر إلهام و دعم لكل حد بيتابعنا .

و خليك فاكر إننا من خلال سلسلة قصص النجاح – أنا موجود على مجلة ناس أون لاين – بنقدملك قصص نجاح واقعية و كمان قريبة منك مش مجرد قصص مجازية أو قصة بعيدة عليك و دا علشان نكون دايما مصدر إلهام ليك و لكل حد محتاج يتعرف أكتر على عالم الواقع و التحديات اللي بجد مش مجرد قصص نجاح وردية بدون كواليس .

و في النهاية بنفكرك إنك ممكن تشاركنا قصتك عن طريق رسالة على صفحة مجلة ناس أون لاين على الفيس بوك من هنا Nas On Line

أو حتى لو تعرف قصة نجاح تستحق المشاركة في سلسلتنا أنا موجود على مجلة ناس أون لاين

تقدر تتواصل معانا و تعرفنا على القصة دي و بإذن الله تكون معانا في أقرب وقت على صفحات مجلتنا .

في إنتظار مشاركتنا برأيك في قصة النهاردة من خلال البوست الخاص بموضوعنا على صفحتنا سواء من هنــا بكلمة دعم منك لبطل قصتنا أو نصيحة معينة حابب تفيد بيها و خليك فاكر إن رأي بطل قصتنا يعبر عن وجهة نظره و تجاربه و خبراته و إحنا دورنا نعرضها و نتبادل وجهات النظر .

عن Nas On Line

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: